Empeza a Copa Balbina VIII Edición Organizada pola Asociación Patexeiros

Empeza a Copa Balbina VIII Edición

Pois efectívamente este vindeiro sábado día 25 de xuño dará comezo un ano máis a Copa Balbina de Embarcacións Tradicionais a Vela, na que este ano será a súa VIII Edición.

Como moitos xa sabedes, ésta é unha competición que fomenta a participación e a xuntanza das moitas embarcacións tradicionais que existen no Golfo Ártabro e que permite ver navegar xuntos a estes fermosos barcos  por diante da vila de Sada.

Ahí vai o extracto do regulamento deste ano. As novidades con respecto a anos anteriores son resaltadas en azul, e fixéronse co afán de aumentar a participación.

EXTRACTO DO REGULAMENTO DA PROBA

Calendario:

1ª Proba: Sábado 25 de Xuño

2ª Proba: Sábado 30 de xullo

3ª Proba: Sábado 27 de agosto
4ª Proba: Sábado 24 de setembro

Proba Extraordinaria puntuable:

Este ano puntuará de novo para a Copa Balbina a Regata de Perbes
Gran premio de Embarcacións Tradicionais “Homenaxe os carpinteiros de ribeira”

Organizada polo Club Marítimo de Perbes que sole ser o primeiro fin de semán de Agosto

1. A Copa Balbina:

A Copa Balbina de Vela Tradicional é unha proba creada pola A.C.M. Os Patexeiros e levada a cabo dentro do calendario de competicións de vela do C.N.R.S. Dispútase en augas de Sada.

Este ano puntuará tamén para a Copa a Regata de Perbes

2. Características dos barcos participantes:

A Copa Balbina e unha proba aberta a todo tipo de embarcacións tradicionais de madeira con propulsión a vela, independentemente da súa tipoloxía, aparello ou eslora.

Ó ser unha proba que pretende fomentar máis a participación e a reunión de embarcacións tradicionais no Arco Ártabro, que a competición en si mesma, admítese a participación de embarcacións con certas modificacións estructurais para adaptalas ós tempos actuais ou feitas en parte con materiais “modernos” (epoxis, fibra de vidrio, etc...), sempre e cando a súa propulsión sexa a vela tradicional (vela de relinga, vela latina, etc...). E tamén se admitirán embarcacións tradicionais de madeira con adaptación a aparello moderno (snipe, etc...) Este punto someterase sempre ó criterio da A.C.M. Os Patexeiros.
Se algunha embarcación con formas tradicionais pero feita totalmente con materiais "modernos" (fibras, epoxis, polietileno, etc...) desexa acompañarnos nalgunha regata da proba, pode facelo, pero non computará na puntuación da regata nin na xeral da Copa Balbina. 

3. Inscricións:

Será obrigatoria a inscrición dos participantes, ven sexa con anterioridade, comunicándoo ó correo patexeiros@hotmail.com ou ben no mesmo momento da participación, comunicándollo ó barco da Organización, CNRS ou Patexeiros.

4. Percorrido da proba.

O percorrido de cada proba desta VIII edición da Copa Balbina será o indicado pola organización en cada regata da mesma, no momento da saída. En cada proba disputaránse 2 mángas que puntuarán individualmente (non se fará a media das mangas).Tamén no momento da saída se especificará se se fan dúas mangas ou unha manga sóa, dependendo das condicións climatolóxicas. Ainda que intentaremos sempre que en cada unha das probas se disputen as dúas mangas.

5. Horarios para probas disputadas en Sada:

NA RAMPA DE SERVIZO DO CNRS ÁS 16:00 HORAS

SAÍDA DA PRIMEIRA MANGA ÁS 17:00 HORAS

AVISOS: VARIOS PITIDOS

1º SINAL: 5 MINUTOS E BANDEIRA AMARELA

2º SINAL: 4 MINUTOS

3º SINAL: 1 MINUTO

4º SINAL: SAÍDA E BAIXADA DE BANDEIRA AMARELA

SEGUNDA MANGA: EN CANTO ENTRE O ÚLTIMO VÓLVENSE A DAR OS AVISOS.

O horario para a proba extraordinaria de Perbes será o que dictamine a Organización do Club Marítimo de Perbes, que en un principio a ten fixada para as 17:30 horas.

6. Responsabilidade:

Todos os participantes na Copa Balbina de vela tradicional farano baixo o seu propio risco e responsabilidade.

Recoméndase ós participantes a tramitación do Cartón de Navegante da FGCMF que polo módico prezo de 10 Euros anuais da cobertura de accidentes ó titular do mesmo.

A Organización recorda ós participantes a obriga de levar a bordo o equipamento regulamentario de salvamento así como a documentación regulamentaria esixida polas autoridades marítimas.

A Organización poñerá polo menos unha embarcación de asistencia para atender ás embarcacións en caso de problemas.

A Organización resérvase o dereito de suspender a proba no caso de que estime que as condicións meteorolóxicas poidan supoñer un risco para os participantes.

7. Sistema de puntuación:

O sistema de puntuación por manga, para a Copa Balbina 2016 VIII Edición estará definido da seguinte maneira:
Por asistencia a cada proba da Copa Balbina, cada barco sumará 5 puntos, excepto pola asistencia á última proba da Copa, na que se entregarán os trofeos, na que a puntuación por asistencia sumará 10 puntos por barco. Estes puntos sumaranse sempre que se participe na proba e se tome a saída nalgunha das mangas dela, independentemente que algún dos barcos quedase descalificado nalgunha das mangas.

No respecto á puntuación por orde de chegada, o primeiro clasificado levará tantos puntos como embarcacións teñan participado, o segundo levará un punto menos, o terceiro un menos ca o segundo, e así sucesívamente ata o derradeiro que levará 1 punto.

• Establécese unha única categoría de embarcacións.
• Cada manga puntuará por separado e ó final sumaranse os puntos conseguidos por cada embarcación nas dúas mangas.
• No caso de se ter que suspender unha das mangas debido ás condicións meteorolóxicas ou outra situación de risco, a puntuación final considerarase a da outra manga, se se tivera disputado.
• A Regata extraordinaria de Perbes puntuará do mesmo xeito cas 4 probas habituais da Copa Balbina disputadas en Sada, estando a expensas de que a Organización do Club Marítimo de Perbes decida facer unha ou dúas mangas na regata.
• Das 4 regatas puntuables, cada patrón/barco pode facer un descarte, que pode elexir aquel no que non poida participar ou no que tivese peor puntuación. Para competir en igualdade de condicións un descarte será obrigatorio.
• Os descartes serán por regata, queremos decir con isto que se un patrón descarta unha das regatas e ésta se fixo a dúas mangas, descartaranse as puntuacións das dúas mangas disputadas nesa regata
• A efectos de fomentar e premiar a participación nas Concentracións de embarcacións tradicionais do Arco Ártabro, sumaranse  puntos adicionais na clasificación xeral ó barco/tripulación por asistencia ás seguintes Concentracións de Embarcacións Tradicionais do Arco Ártabro. (Enténdese  puntos por cada unha das concentracións ás que asista)

Concentración de Ares: 5 PUNTOS

III Xuntanza Patexeira de Embarcacións Tradicionais - Sada: 10 PUNTOS

Concentración de Redes: 5 PUNTOS

Parrocheira de Ferrol: 5 PUNTOS

8. Premios

Ó rematar todas as probas puntuables para a Copa Balbina, entregaranse trofeos ós tres primeiros barcos clasificados. Ademáis o barco gañador será o herdeiro por un ano da Copa Balbina que se lle entregará nun acto aparte, unha vez se lle faga e coloque a praca que identifique o nome do gañador, e a custodiará no sitio que él considere máis representativo ata poñela en xogo na vindeira edición. Tamén se entregará un premio ó patrón ou tripulante que a máis probas da VIII Edición da Copa Balbina teña asistido (só a probas da Copa Balbina, non a partipacións en xuntanxas e Concentracións, debido á dificultade de comprobar a asistencia dun tripulante ás mesmas)

9. Outras consideracións:

Os participantes dan a súa autorización expresa á publicación das fotografías que se realicen durante a proba e que poderán ser publicadas nos medios dixitais da A.C.M. Os Patexeiros (blog e facebook) ou outro medio que a Organización considere.

A Organización resérvase o dereito de modificar este resumo de normas da proba. Calqueira modificación anterior á celebración das probas será posta en coñecemento dos participantes con anterioridade á saída polos medios que se estimen convintes.

Calqueira controversia ou desputa entre participantes será analizada e resolta polo xuiz/xuices en consulta coa Organización.

Advírtese expresamente que non se pode navegar por diante da liña de saída cando falte un minuto ou menos para a saída, podendo dar lugar, esta acción, á desclasificación da embarcación nesa manga.

As viradas faranse sempre deixando a boia por babor. Penalizarase ca reducción de 5 puntos ó patrón/barco que non a tome corréctamente. O patrón/barco que desexe enmendar ese erro para evitar a perda deses puntos deberá facer unha virada completa a esa boia para logo continuar ca regata.

Calqueira outro punto que non esté recolleito neste regulamento será tratado no momento que surxa polo comité de regata. Sendo a súa decisión inapelable.

Colaboran: